Удмурт литератураен тодмато «Шуныт пумиськон» клубын Сюмси ёросын

«Шуныт пумиськон» клубмы кылем арын 10 ар котырес лыдпуссэ пусйиз. 10 ар уж сыӵе мынэ ини милям. Бичаськиськом мӧйыосын, эшшо ветло на ми доры пичи эшъёсмы школаысь. <…> Одӥгпол толэзьлы бичаськиськом. Мон ачим библиотекарь бере, дасясько темаос яке гожъясьлэн котырес лыдпусэзлы, яке кылбурчиослэн котырес лыдпусъёссылы. Сыӵе темаос дасясько но, ӵош ортчытӥськом», — шуэ  «Шуныт пумиськон» клублэн кивалтӥсез, Кильмезьысь гурт клубен кивалтӥсь Ольга Чернова.

Пумиськонъёс улсын, кылсярысь, гожъясьлы Аркадий Клабуковлы 115 ар тырмонлы, Григорий Симаковлы 100 ар тырмонлы сӥзем ужрадъёс ортчытӥзы ини.

Нош Анай кыллэн нуналэзлы сӥзьыса но Ульяновскысь Нылпи лыдӟиськонлы юрттонъя фондэн но Нылпиослы но быдэ вуымтэослы улосвыл лыдӟетъюртэн радъям «Наши истоки. Читаем фольклор» 1-тӥ калыккуспо акци улсын «Удмурт калыклэн выжыкылъёсыз» ужрад ортчытӥзы.

Пиналъёс элькунамы 100-лэсь ятыр йӧслыкъёс шуыса тодӥзы. Удмурт но бигер кылын мультфильмъёс учкизы. Удмурт выжыкылъёсты но дауркылъёсты лыдӟизы, Лӧпшо Педунен тодматскизы. Мадиськонъёсты тодылӥзы но удмурт калык шудонъёсын шудӥзы. Ужрадлы луыса лыдӟетъюртын туспуктэм лэсьтон инты, «Удмурт выжыкыл» но «Родной язык, как ты прекрасен!» адӟытонъёс радъямын вал.

Нылпиос мӧйыослы «Крестьян но вумурт» выжыкыл возьматӥзы, «Мифы удмуртского народа» лэпбук лэсьтӥзы.

Таӵе пумиськонъёс пиналъёслы удмурт кылэн, лулчеберетэн тодматскыны луонлык кылдыто. Шаерамы пӧртэм калыкъёс тупаса, ог-огзэс валаса уло шуыса валан сёто.

https://udmurt.media/udm/news/obshchestvo/56620/