Дом Дружбы народов /
  • Иворъёс
  • Яр каргуртын «Бадӟым удмурт диктант Яр сямен» ортчытозы
  • Яр каргуртын «Бадӟым удмурт диктант Яр сямен» ортчытозы

    8 февраля 2018 г.


    20-тӥ тулыспалэ Яр ёрос лыдӟетъюртын анай кыллы сӥзем «Бадӟым удмурт диктант Яр сямен» ортчоз. Со элькун ужрадлэн репетициез луоз.

    «Элькун «Бадӟым удмурт диктант» луэ ке, тӥни со азьын репетировать кариськом  Таиз луоз 20-тӥ тулыспалэ, пуксёнэ, малы ке шуоно милям гуртъёсысь автобусъёс тросэз пуксёнэ ветло», — вераз акциез малпась, Яр ёрос лыдӟетъюртысь ӧнерчи Татьяна Малых.

    Яр ёросын удмурт кылын диктант гожтон куинетӥзэ радъяське ни. Кылем арын со экологилы сӥземын вал, нош туэ, элькун «Бадӟым удмурт диктант» кадь ик, Кузебай Гердлэн вордскем дырысеныз 100 ар тырмонлы, ивортӥз Татьяна Малых.

    «Ми текст бырйиськом, арын кыӵе ке даноез лыдпус вань ке, тӥни соя бырйиськом. Кылем арын экологилэн арезлы темамы вал милям — шырчик сярысь. Туэ Кузебай Гердлэн котырес лыдпусэз бере, солэсь текстсэ басьтом», — шуиз Татьяна Малых.

    Ӧнерчилэн кылъёсызъя, арысь аре та ужрадэ ог 15 адями пыриське. Диктант гожтон понна гуртъёсысь Яре автобусэн лыктоно бере, ужрад нуназе ортче, куке пиналъёслэн урокъёссы мыно. Соин ик мылкыд карись нылпиослэн акцие пыриськыны луонлыксы ӧвӧл.

    «Нырысетӥ арзэ ваизы дышетӥсьёс школаысь пиналъёсты, но урокъёсысь шуггес лэзьыны соосты, соин кылем аре ӧз ни лыктылэ пиналъёс. Но соос медо вал, соослэн ӧз пӧрмы автобусэн», — шуэ Татьяна Малых.

    Гожтэм ужъёсты лыдӟетъюртысь ӧнерчи ачиз эскере. Пыриськисьёс удмурт кылъя дышетӥсьёс бере, диктантсы но туж юн гожтэмын луэ, пусъе со.

    Ватсалом, анай кыллэн нуналэзлы сӥзьыса, 21-тӥ тулыспалэ Яр ёросын эшшо одӥг ужрад ортчоз на. Быдэс ёросысь калык ужаны йӧскалык дӥсеныз потоз.

    «Удмуртъёс гинэ ӧвӧл, котькуд калык аслэсьтыз дӥськутсэ мед возьматоз. Со пыр возьматыны аслад калыкеныд данъяськонэз», — валэктӥз Татьяна Малых акцилэсь ужпумзэ.

    Тодэ вайытом, элькун «Бадӟым удмурт диктант» туэ 31-тӥ южтолэзе ортчоз. Ижкарын, элькунлэн ёросъёсаз но мукет улосвылъёсын удмуртъёс тросэн улон интыосын нимысьтыз площадкаос ужалозы. Со сяна, вань мылкыд карисьёс диктантэз «Мынам Удмуртие» радиоысь кылзыса гожтыны быгатозы.

    https://udmurt.media/udm/news/obshchestvo/31390/